गडचिरोली | --°C | --°C |
गडचिरोली, ता.८: बहुप्रतीक्षित वडसा-गडचिरोली लोहमार्गाचे ऑनलाईन भूमिपूजन मंगळवारी(ता.९) केंद्रीय रेल्वेमंत्री सुरेश प्रभू यांच्या हस्ते नागपुरात होणार असल्याची माहिती खा.अशोक नेते यांनी आज पत्रकार परिषदेत दिली.
पत्रकार परिषदेला नगराध्यक्ष योगीता पिपरे, भाजपचे ज्येष्ठ नेते बाबूराव कोहळे, नगरसेवक प्रमोद पिपरे, नगर परिषद उपाध्यक्ष अनिल कुनघाडकर, रेखा डोळस, स्वप्नील वरघंटे, जिल्हा परिषद सदस्य मीना कोडाप, अल्पसंख्याक आघाडीचे नेते जावेद अली उपस्थित होते.
खा.अशोक नेते यांनी सांगितले की, आपण आमदार असताना १५ वर्षांपासून वडसा-गडचिरोली लोहमार्ग व्हावा,यासाठी अविरत प्रयत्न केले. अनेकदा विधिमंडळात प्रश्न उपस्थित केले. खासदार झाल्यानंतर लोकसभेतही वारंवार पाठपुरावा केला. त्यानंतर केंद्र सरकारने या लोहमार्गाला मंजुरी दिली. शिवाय १६१ कोटींचा निधीही लोहमार्गासाठी मंजूर केला. मागील काही महिन्यांपासून या मार्गासाठी जमीन संपादनाची प्रक्रिया सुरु असून, ती आता अंतिम टप्प्यात आहे.
या अनुषंगाने उद्या ९ मे रोजी नागपुरात लोहमार्ग विभागाने उपलब्ध केलेल्या विविध सुविधा, तसेच वडसा-गडचिरोली लोहमार्गाचे ऑनलाईन भूमिपूजन केंद्रीय रेल्वेमंत्री सुरेश प्रभू यांच्या हस्ते होणार आहे. या कार्यक्रमाला केंद्रीय भूपृष्ठ वाहतूक मंत्री नितीन गडकरी, मुख्यमंत्री देवेंद्र फडणवीस, केंद्रीय गृहराज्यमंत्री हंसराज अहीर, राज्याचे वन व वित्तमंत्री सुधीर मुनगंटीवार, आदिवासी विकास राज्यमंत्री अम्ब्रिशराव आत्राम उपस्थित राहणार असल्याची माहिती खा.अशोक नेते यांनी दिली. उद्या भूमिपूजन होणार असल्याने विरोधकांच्या आरोपातील हवा गूल झाल्याचेही खा.नेते म्हणाले.