गडचिरोली | --°C | --°C |
गडचिरोली,ता.२४: शहरातील गजबजलेल्या फुले वॉर्डात एका अविवाहित इसमाचा धारदार शस्त्राने वार करुन खून केल्याची घटना उघडकीस आल्याने खळबळ माजली आहे. दुर्योधन रायपुरे(४८) असे मृत इसमाचे नाव आहे.
अत्यंत गरीब असलेले दुर्योधन रायपुरे हे सामाजिक कार्यकर्ते होते. फुले वॉर्डातील आपल्या घरात ते एकटेच राहत होते. आज सकाळी ते मृतावस्थेत आढळून आले. त्यांच्या अंगावर धारदार शस्त्राने वार केल्याच्या खुणा आढळल्या आहेत. उपविभागीय पोलिस अधिकारी प्रणिल गिल्डा, पोलिस निरीक्षक प्रमोद बानबले यांनी घटनास्थळी भेट देऊन पाहणी केली. श्वान पथकासही पाचारण करण्यात आले. यावेळी श्वानाने आरमोरी मार्गावरील शेतापर्यंतचा रस्ता दाखवला. त्यामुळे आरोपी याच मार्गाने पसार झाल्याचा अंदाज आहे. गडचिरोली पोलिस घटनेचा तपास करीत आहेत.