गडचिरोली | --°C | --°C |
गडचिरोली,ता.२२: येत्या २४ तासांत गडचिरोली जिल्हयात एक किंवा दोन ठिकाणी मुसळधार पावसाची शक्यता हवामान खात्याने वर्तविली आहे.
जिल्ह्यातून वाहणाऱ्या वैनगंगा, प्राणहिता, गोदावरी, इंद्रावती इत्यादी नद्यांच्या पाण्याची पातळी सामान्य आहे. मात्र, तेलंगणा राज्यातील मेडिगड्डा प्रकल्पामुळे सिरोंचा तालुक्यातील काही गावांमध्ये पूर येण्याची शक्यता आहे. मेडिगड्डा प्रकल्पाचे ८५ पैकी ४१ दरवाजे सुरु करण्यात आले असून, त्यातून ७५९३ क्यूमेक्स पाणी सोडण्यात येत आहे.गोदावरी व प्राणहिता नदीच्या पाणलोट क्षेत्रात होत असलेल्या अतिवृष्टीमुळे बॅरेजच्या उर्ध्व भागात असलेल्या श्रीरामसागर प्रकल्प, कड्डम प्रकल्प, येलमपल्ली प्रकल्प, पार्वती बॅरेज व सरस्वती बॅरेज मधून मोठ्या प्रमाणात पाण्याचा विसर्ग करण्यात येत आहे. यामुळे रात्री ९ वाजतापर्यंत मेडिगड्डा बॅरेजचे पुन्हा २३ दरवाजे उघडण्यात येणार असून, त्यातून अंदाजे १६ हजार ९९० क्यूमेक्स पाण्याचा विसर्ग करण्यात येईल.
त्यामुळे नदी काठावरील गावातील नागरिकांनी सतर्कता बाळगावी, शिवाय विजेपासून स्वत:चा बचाव करण्यासाठी विनाकारण बाहेर पडू नये आणि पुलावरुन पाणी वाहत असताना पूल ओलांडू नये, असे आवाहन जिल्हा आपत्ती व्यवस्थापन कक्षाने केले आहे.