गडचिरोली | --°C | --°C |
गडचिरोली,ता.४: निराधार बुजुर्ग आदिवासी महिलेवर एका ट्रक चालकाने ट्रकमध्येच बलात्कार केल्याची संतापजनक घटना २९ सप्टेंबर रोजी एटापल्ली तालुक्यात घडली आहे. याप्रकरणी पोलिसांनी संतलाल जयराम कोठारी(३१) रा. बुरसातरुल, ता.गुरुकुंडल, जि.कांकेर, छत्तीसगड यास अटक केली आहे.
घटनेची हकीकत अशी की, पीडित महिला ही २९ सप्टेंबरला दुपारी एटापल्ली येथील बँकेतून निराधार योजनेची रक्कम काढण्याकरिता जात असताना एलचिल गावानजीकच्या कल्लेम फाट्याजवळ आरोपी संतलाल कोठारी याने एटापल्लीला पोहचवून देतो, असे सांगून ट्रकमध्ये बसविले. त्यानंतर तिच्यावर बलात्कार केला. पीडित महिलेने कसेबसे अहेरी पोलिस ठाणे गाठून फिर्याद नोंदविल्यानंतर पोलिसांनी संतलाल कोठारी याच्यावर भादंवि कलम ३७६ अन्वये गुन्हा दाखल केला.
त्यानंतर एलचिल पोलिस मदत केंद्राच्या हद्दीतील सीसीटीव्ही कॅमेऱ्यातील फूटेज तपासल्यानंतर एका साक्षदाराच्या मदतीने गुन्ह्यासाठी वापरलेला ट्रक आणि ट्रकचालकाची ओळख पटविण्यात आली. पुढे बुरसातरुल येथे जाऊन पोलिसांनी आरोपी संतलाल कोठारी यास अटक केली. त्याने गुन्ह्याची कबुली दिल्यानंतर काल (ता.३) त्याला अहेरी येथील न्यायालयात हजर करण्यात आले. न्यायालयाने त्यास ६ ऑक्टोबरपर्यंत पोलिस कोठडी सुनावल्याची माहिती उपविभागीय पोलिस अधिकारी अमोल ठाकूर यांनी दिली. पोलिस उपनिरीक्षक आरती नरोटे प्रकरणाचा तपास करीत आहेत.
मागील काही महिन्यांपासून सुरजागड पहाडावरुन दररोज शेकडो ट्रक लोहखनिज वाहून नेतात. यामुळे रस्ते खराब झाले असून, अपघातांचे प्रमाणही वाढले आहे. यामुळे जनतेत तीव्र रोष व्यक्त केला जात आहे. अशातच आदिवासी महिलेवर बलात्काराची घटना घडली. यातील आरोपी हा लोहखनिज वाहून नेणाऱ्या ट्रकचा चालक तर नाही ना, या शंकेने नागरिकांमधून संतापाचे प्रतिध्वनी उमटू लागले आहेत.
.