गडचिरोली | --°C | --°C |
कुरखेडा, ता.१८: येथील उपविभागीय पोलिस अधिकारी कार्यालयाच्या अधिनस्थ विशेष जलद पथकातील जवानावर तीन युवकांनी जीवघेणा हल्ला केल्याची घटना काल(ता.१७) दुपारी साडेबारा वाजताच्या सुमारास घडली. उमाजी हलामी, असे जखमी जवानाचे नाव आहे. हल्लेखोरांविरुद्ध कुरखेडा पोलिस ठाण्यात गुन्हा दाखल करण्यात आला असून, आरोपी फरार आहेत.
पोलिसांनी दिलेल्या माहितीनुसार, उमाजी हलामी यांना गोपनीय माहिती मिळाल्याने ते संबंधित कर्तव्यावर मोटारसायकलने जात होते. वाटेत सुसाट वेगाने ओव्हरटेक करणाऱ्या युवकास त्यांनी हटकले. यावेळी मोटारसायकलवर असलेल्या युवकांनी उमाजी हलामी यांना शिवीगाळ करुन पानठेल्यातील लाकडी फळीने त्यांच्या डोक्यावर प्रहार केला. श्री.हलामी यांच्यावर उपजिल्हा रुग्णालयात प्रथमोपचार केल्यानंतर त्यांना गडचिरोलीला हलविण्यात आले. हलामी यांच्या तक्रारीवरुन पोलिसांनी आरोपी समीर शेख, आफताब मोहम्मद अली शेख व अन्य एका युवकाविरुद्ध भादंवि कलम ३५३,३३२, २९४, ५०६, ३४ अन्वये गुन्हा दाखल केला आहे. मात्र, आरोपी फरार असल्याचे सांगण्यात येत आहे. पोलिस उपनिरीक्षक चौधरी घटनेचा तपास करीत आहेत.