गडचिरोली | --°C | --°C |
गडचिरोली,ता.१४: येथील नगर परिषदेद्वारे पाणीपुरवठा करण्यात येणाऱ्या नळाच्या पाण्यात चक्क मांसाचे तुकडे आल्याने खळबळ माजली असून, नागरिकांचे आरोग्य धोक्यात आले आहे.
१० जून रोजी विवेकानंदनगरातील योगेश देवोजवार नामक युवकाने पाण्याच्या टाकीत उडी मारुन आत्महत्या केली. त्याचा मृतदेह चक्क शहराला पाणीपुरवठा करणाऱ्या पाईपमध्ये अडकला होता. नगर परिषद कर्मचाऱ्यांनी मृतदेह बाहेर काढल्यानंतर दोन दिवस पाणीपुरवठा बंद होता. आज पाणीपुरवठा सुरु होताच सकाळी चामोर्शी मार्गावरील वीर बाबूराव शेडमाके चौकातील मुन्ना आत्राम यांच्या घरच्या नळाच्या पाण्यात चक्क मांसाचे तुकडे आढळून आले.
त्यानंतर काही पत्रकार आणि नागरिकांनी मुख्याधिकाऱ्यांकडे जाऊन विचारणा केली. मात्र, त्यांच्या उत्तराने नागरिकांचे समाधान झाले नाही. योगेश देवोजवारचा मृतदेह कुजलेल्या अवस्थेत पाईपलाईनमध्ये अडकून होता. त्यामुळे पाण्याची टाकी आणि पाईपचे निर्जंतुकीकरण होणे गरजेचे होते. परंतु आज चक्क मांसाचे तुकडे आढळल्याने टाकी आणि पाईपची योग्यप्रकारे स्वच्छता झाली नसल्याचे दिसून आले. नगर परिषदेच्या या अक्षम्य दिरंगाईबद्दल नागरिकांमध्ये प्रचंड संताप व्यक्त करण्यात येत आहे.