गडचिरोली | --°C | --°C |
अहेरी, ता.२४: स्वतंत्र विदर्भासाठी आग्रही भूमिका घेणाऱ्या नाग विदर्भ आंदोलन समितीचे केंद्रीय उपाध्यक्ष, माजी जिल्हा परिषद सदस्य व आलापल्ली येथील राजे धर्मराव कला व वाणिज्य महाविद्यालयाचे प्राचार्य डॉ.अरुण लोखंडे(६५) यांचे आज पहाटे निधन झाले. त्यांच्या पश्चात पत्नी व दोन विवाहित मुली आहेत. कुटुंबीय बाहेरगावी असून, ते आल्यानंतरच अंत्यसंस्कार करण्यात येणार आहेत.
मूळचे वर्धा जिल्ह्यातील आर्वी तालुक्यातील रोहणा येथील रहिवासी असलेले डॉ.अरुण लोखंडे यांना नाग विदर्भ आंदोलन समितीचे नेते व माजी खासदार दिवंगत राजे विश्वेश्वरराव महाराज यांनी अहेरी येथे आणून त्यांच्याकडे राजे धर्मराव कला व वाणिज्य महाविद्यालयाच्या प्राचार्यपदाची धुरा सोपविली. त्यांच्याच नेतृत्वात राजे धर्मराव शिक्षण मंडळाने अहेरी उपविभागात शाळा, महाविद्यालयांचे जाळे निर्माण केले. दिवंगत राजे विश्वेश्वरराव महाराज, दिवंगत राजे सत्यवानराव महाराज व राज्याचे विद्यमान आदिवासी विकास राज्यमंत्री राजे अम्ब्रिशराव आत्राम यांचे अत्यंत विश्वासू सहकारी म्हणून प्राचार्य डॉ.लोखंडे यांना ओळखले जात होते. त्यांनी गडचिरोली जिल्हा परिषदेचे तिनदा प्रतिनिधीत्व केले. मृदूभार्षी व सालस व्यक्तिमत्व असलेल्या प्राचार्य लोखंडे यांच्या निधनाबद्दल शैक्षणिक व राजकीय वर्तुळात शोक व्यक्त केला जात आहे.